早兩日收工諗住死線前食埋飯先返屋企，但好多餐廳5點半已經截左單。最後去左屯門新開嘅鼎泰豐食左個光速餐，17:40坐低，未到18:00走人。啲位幾好坐，預計唔係疫情下，人多都唔會太迫。我叫左碟排骨蛋炒飯，個碟好細隻，好似平時茶記2/3咁上下，用左珍珠米黎炒，我個人食炒飯鍾意絲苗多啲，純個人喜好。但個飯炒得好有鑊氣、好香！屬於油比較多嗰種（接受範圍內），唔係好乾爽嗰隻，係唔太健康，但其實咁樣係好食啲嘅 XD 塊豬排好重胡椒味，撈埋飯食風味十足。質地好鬆軟，但又唔係用食粉醃到腍腍爛爛嗰種，加上肥瘦適中，啱晒食肉獸嘅胃口。
阿Kit食牛肉麵，個湯上菜時已經唔熱，只係微暖；但我理解而家有限聚令餐廳收6點，我地入座其實人地已經差唔多要收舖，個湯唔熱情有可原。不過佢地嘅牛肉麵真係好普通，好冇個性，你知道自己食緊牛肉麵，但又講唔出佢同其他「流流地」嘅舖頭有乜分別。另外點左一籠絲瓜蝦仁小籠包，阿Kit一向鍾意呢樣野，我就麻麻地絲瓜。嗰日籠小籠包係即叫即蒸，熱辣辣，塊皮做得好好，薄而不穿。btw，有得揀就唔使食鼎泰豐；但街坊近近地呢間可以幫襯，幾位店員服務仲幾有禮貌。
鼎泰豐
地址: 屯門鄉事會路83號V City商場MTR層M37&M38號舖
電話: (852) 2834 8818
Search